Mai ita Koñese Mana Venessa Cunha Alves, Aprezentadora Notisia Nasional

Ba Lafaek nia belun sira ne’ebé gosta akompaña notisia iha televisaun, karik familiár ona ho Mana Venessa Cunha Alves nia oin, aprezentadora joven ida iha televisaun nasional.

Mana Venessa hahu nia karreira iha mundu televisaun iha tinan 2017 liuba, bele dehan katak nia maka sai aprezentadora dahuluk bainhira programa notisia iha televisaun ne’e lansa. Mana ho naran estimada “Beta” antes hahu nia kareira nu’udar aprezentadora, serbisu mos nu’udar funsionaria iha setor privadu no mós governu.

Iha momentu hirak liu ba Mana Beta bele aloka nia tempu hodi bele simu intervista husi Lafaek. Husi intervista ne’e, Mana Beta hatan ona perguntas balun husi Lafaek, karik ho resposta ne’e, bele mós hakmaan kolega sira nia kuriozidade durante akompaña nia kareira.

Mai ita koñese liu tan!

Sai Aprezentadora ne’e hanesan Mana nia Mehi duni ka?

Koalia kona ba mehi hau nia mehi la’os atu sai hanesan aprezentadora, hau nia mehi hakarak sai diplomata depois kompletu hau nia estudu. Sai nu’udar aprezentadora ne’e hanesan interesante deit, bainhira akompaña televisizaun hau mós dehan dala ruma hau hakarak sai hanesan ne’eba.
Maibe agora dadaun hau orgullu no apresia tebes buat ne’ebé ita interesante deit iha final bele sai realidade tanba ita la espera buat ne’e sei sai relidade.

Mana bele fahe Mana nia esperiensia antes hahu kna’ar nu’udar Aprezentadora?

Hau hahu kareira bainhira sei iha banku universitario semestre neen, hanesan funsionária serbisu temporária nu’udar Brand Ambassador ba Kompañia tua ida ho durasaun durante tinan ida ho balun.

Iha biban ne´e hau mós hetan oportunidade ba serbisu voluntariu iha Ministerio Agrikultura no Peska (MAP), Direcão Seguranca Alimentar, durante fulan tolu.

Hafoin Remata kursu lisensiatura iha Departamentu Relasaun Internasionál Fakuldade ISH-UNPAZ, hau hetan tan oportunidade hodi tuir selesaun ba vaga hosi Empressa Grupo Media Nasional.

Fofoun serbisu hau sai nu’udar ko’ordenadora ba programa no tanba haree hau nia maneira komunikasaun di’ak no iha sujestaun husi kolega sira atu koko halo simulasaun antes halo lansamentu, ema husi Portugal mós mai halo teste mai ami, como dehan diak entaun sira maka hili hau hodi sai hanesan aprezentadora ba lansamentu televisaun ne’e.

­­­­

Mai lao’s husi background Komunikasaun Sosial, oinsa bele desenvolve aan hodi serbisu ba area ne’ebé la familiar ne’e?

Iha momentu ne’ebá, hau sente dehan buat hotu-hotu difisil mai hau, hau buka referensia barak husi youtube husi google no hetan mós ajuda husi kolega sira, kleur ba kleur ho sentimentu no hakarak hatene ne’ebé maka boot, buat ne’ebé ita labele ita sente bele. Labele tauk atu koko buat saida deit.

 

Saida maka Mana gosta bainhira serbisu nu’udar aprezentadora?

Hau gosta tanba ema bele koñese barak, bele aprende buat barak liliu iha parte mundu juralismu nian, buat hanesan ema labele ita mós bele, fó koñesimentu luan liu tan mai hau.

Saida maka mana nia atinjimentu boot durante hala’o knar nu’udar aprezentadora?

Hau bele intervista diretamente Sr. Xanana Gusmão iha momentu lansamentu televisaun ne’e. Momentu ne’eba, hau sente katak hau la prepara hau nia aan masimu tanba kalan hau toba mós la dukur hodi hanoin saida maka hau sei koalia iha ne’eba. Kolega sira mós dehan katak Sr. Xanana kuandu ita husu nia, nia sei husu fila fali mai ita. Tan ne’e iha momentu ne’eba hau buka referensia barak. Iha loron intervista, antes hahu on air, hau mos uza oportunidade hodi konversa ho Sr. Xanana.

Depois intervista husi primera vez ida ne’e, entaun hau sente katak intervista oin mai mós hau bele, dia seguida tuirmai hau mós intervista Sr. Mari Alkatiri, Sr. Fernando La Sama, Sr. Fidelis Magalhães no figura sira seluk tan.

Desafiu saida maka mana hasoru durante ne’e?

Sai aprezentadora ne’e kolen, sim serbisu hotu-hotu ne’e sempre kolen sai aprezentadora ne’e la hare ba oras tuku 5 ita fila ona, maibe hein ita nia serbisu ne’e hotu ona maka ita foin bele fila. Ita fo liu ita nia tempu iha serbisu fatin.

Oinsa Mana bele koalia relaxe bainhira koalia iha Kamera nia oin?

Antes ne’e hau hanesan tauk ten laiha mentalidade hodi halo speech ka aprezentasaun, imporantene hodi bele friendly ho ema hotu-hotu, nune’e kuandu ita halo aprezentasaun ema ruma bele konsola ba ita. Pesolamente mai hau nia aan maka ne’e, iha momentu ne’ebé maka hau sente difisil loos sente katak hau labele halo buat hotu hotu, maibe hau iha ema ida ka ema rua maka sempre konsola mai hau, no fo advise mai hau, motiva hau katak “o bele, o bele, o bele” ida ne’e maka halo hau la tauk, la moe para halo aprezentasaun ka koalia iha publiku.

Imporante maka tenki fiar aan, bele improvisasi labele patokan ba buat ne’ebe maka iha, no bainhira ita koalia sala ita prontu atu simu kritika husi ema se-se deit tanba liuhusi kritika ne’e bele desenvolve ita–nia aan.

No bainhira koalia iha kamera nia oin sente katak ita koalia ho ema. Maibe buat  hotu-hotu ne’e mental maka importante. Liu husi ami nia esforsu hodi aprende rasik maka ami sente katak buat hotu-hotu ami bele halo.

Bele fó Mana nia mensajen ba kolega sira ne’ebé hakarak sai mos aprezentadora?

Mentalidade maka tenki masimu no buka atu aprende. Mesmo ita dehan la bele maibe ita koko para atu bele nafatin. Aprende saida maka ita koko tiha ona liliu ba area jurnalismu nian. katak ita prepara ita nia mentalidade masimu buka referensia barak  liu husi saida deit, nune’e ita nia kuñesementu diak liu tan. Husi hakarak ne’ebé boot ita bele alkansa ita-nia hakrak.

Antes hahu karriera too agora, se mak sai hanesan Mana nia motivador?

Ema hirak ne’ebé sai motivador durante hau nia jornada maka Maim ho Pai, liu husi sira nia liafuan ”A vida é muita curta para acordar com arrependimentos e acredito por tudo aconteça por uma razãon se tiver uma chance agarre com as duas mãos e isso vai mudar a sua vida”  liu husi sira nain rua nia orientasaun no moral.

Alende Inan Aman iha mós hau nia Maun Alin sira ne’ebé maka hau konsidera hanesan hau nia motivador ne’ebé maka suporta hau iha kondisaun saida deit. Liu husi sira nia suporta tomak, maka halo hau sai ema ou feto ne’ebé independente no brani hasoru kualker obstáculo no desafiu.

Temi tok figura aprezentador sira ne’ebé sai Mana nia favoritu?

Figura ne’ebé maka durante ne´e sai hanesan hau nia inspiradora maka Oprah Winferey no Najwa Shihab, hau kontente e gosta loos sira nain rua tamba sira nain rua feto ne´ebe matenek no kritíku tebes, nune’e banhira hau inisia hau nia kareira nudar apresentadora hau hili sira nain rua nudar hau nia figura no hau nia favoritu.

Ho nia mensajen positivu hirak ne’e karik bele inspira Lafaek nia belun sira. Susesu nafatin Mana Beta no espera katak mana nia mehi sira bele sai realidade!