Iha ai-laran tuan ida, moris balada oioin iha neébá.
Rusa, Asu, Kuda, Lekirauk no Manu-tafui sempre
halimar hamutuk. Maibé, sira balun la gosta
Manu-tafui tanba nia bele semo.
Loron ida, sira halimar hamutuk Manu-tafui hakbesik
ba sira no sira sees tiha.
Rusa dehan, “Lalika halimar
ho Manu ne’e! Nia loko-an loos
tanba nia bele semo.”. Asu hatutan,
“Ó labele mai halimar ho ami.
Ami lakohi halimar ho ó. Loos ka lae kolega
sira?” Sira seluk doko ulun de’it.
Manu-tafui triste loos ho sira-nia hahalok ne’e. Nia la’o fila mesamesak
de’it. Nia hanoin iha laran, “Tanbasá maka sira la gosta ha’u? Ha’u halo
sala saida?”
Maibé, iha maluk ida maka sempre hakarak halimar ho nia. Maluk di’ak
ne’e maka Lekirauk.
Bainhira sira halimar, Lekirauk dehan ba Manu-tafui, “Husik ba ó lalika
laran-taridu. Ha’u prontu atu sai ó-nia belun.”
Loron ida, Manu-tafui hakarak tenta dala ida tan atu halimar ho sira.
Sira goza nia dehan, “Moe la iha…moe la iha!!!”
Manu-tafui triste no semo ba tuur tiha iha ai-leten.
Teki teki nia haree samea boot ida, subar hela iha du’ut laran
atu bobar Rusa.
Nia semo tun husi ai-leten hodi tebe, samea ne’e halai bá
dook tiha. Rusa ta’uk loos haree samea boot ne’e.
Asu, Kuda no Lekirauk hakfodak haree
Manu-tafui nia aten-barani ne’e.
Asu dehan, “Wow!!! Ó barani loos
Manu-tafui. Sorte hodi ó, selae samea bobar
mate Rusa.”
Lekirauk mós hatutan, “Haree ona! Ha’u
dehan nia di’ak ka lae?”
Rusa fó obrigadu no husu deskulpa ba
Manu-tafui.
Iha loron ne’e kedas, sira hotu halo belun di’ak
ho Manu-tafui
