Maun Jose de Jesus, tinan 43 hela iha Suku Hautoho,
Postu administrativu Remexio, Aileu. Maun Jose
hanesan pesoál apoiu suku nian. Nia mós ativu tebes
iha komunidade, liuliu atu muda mentalidade no
hanoin ne’ebé la kontribui ba balansu jéneru iha
sira-nia komunidade.
Maun Jose mós hanesan koordenadór ba Protesaun
Labarik iha nia suku.
Banhira forma família, Maun Jose seidauk iha
koñesementu kona-ba planeamentu família, tanba
ne’e laiha spasu ba oan no mós ho vida agrikultór
laiha rendimentu ne’ebé sufisiente, katak nesesidade
uma-laran komesa aumenta. Situasaun ne’e, motiva
Maun Jose atu aprende no tuir treinamentu kona-ba
planeamentu família no oinsá kria spasu ba oan.
Nia hanoin katak banhira ita kria spasu ba oan, ita
tulun ona feen ho oan nia saúde no mós família bele
moris armonia.
Aleinde ne’e, Maun Jose mós sempre tulun nia
kaben hanesan; Te’in, fase-bikan, fase-roupa, tau
matan ba labarik no akompaña kaben no oan ba
iha sentru saúde, hodi kontrola sira-nia saúde.
Benefísiu husi tulun malu, maka kria armonia iha
família. Husi Maun Jose nia observasaun mós hateten
katak, iha nia suku aman sira akompaña
sira-nia kaben no oan bá halo tratamentu, liuliu iha
tempu SISCa (Servisu Integradu Saúde Comunitáriu).
Maun Jose hanoin katak, nu’udar aman, iha dever
no responsabilidade ida-ne’ebé ita tenke halo.
