Iha eskola Mota-ulun, Boralai ho nia kolega sira halo votasaun
hodi hili sira-nia xefe da turma.
Iha votasaun ne’e, Biketi kontente tanba nia maka sai manán-na’in no xefe da
turma ba klase 4.
Manorin dehan, “Biketi, sai xefe da turma, ó maka sei hatudu uluk
ezemplu ba ó-nia kolega sira.”
Loron tuirmai, Manorin Sidalai tuir hela enkontru. Nu’udar xefe
da turma, Biketi haruka nia kolega sira tuur hakmatek hodi
estuda. Maibé Nona ho Boralai tuda surat-tahan ba malu, no
la’o bá-mai hodi book kolega seluk ne’ebé estuda.
Hanesan xefe da turma, Biketi hanoin nia tenki fó sansaun ruma.
Biketi dehan, “Nona ho Boralai, ha’u husu imi atu tuur hakmatek
tanba imi hili ona ha’u no imi mós tenke fó fiar ba ha’u.”
Tanba sira la rona nafatin, Iha tempu rekreiu Biketi
deside hodi fó sansaun ba Nona ho Boralai.
Biketi dehan, “Ha’u tenke fó sansaun ba imi, atu kolega
seluk labele halo tuir saida mak imi halo.”
Bainhira remata rekreiu, Boralai ho Nona mós arrepende ho sira-nia hahalok.
Biketi dehan, “Ha’u-nia responsabilidade maka haree no tau-matan ba imi
bainhira manorin laiha.”
Boralai ho Nona hatán, “Ó-nia desizaun di’ak, idane’e hanesan lisaun ba ami, ba oin ami sei rona ó no la halo tan.
Manorin tama ba klase laran hakfodak hodi dehan, “Imi estuda grupu hakmatek loos.” Boralai hatán, “Ohin
xefe da turma husu ami atu estuda grupu hamutuk.” Nona hatutan, “Xefe da turma dehan, karik manorin
laiha klase ami labele halo barullu.”
Manorin louva Biketi tanba nia responsabiliza duni knaar
ne’ebé sira fó ba nia. Ikusliu, sira hotu basa-liman ba Biketi-nia lideransa ho
kontente.
