Iha tempu uluk liubá, iha knua ida moris família ida ho ninia oan-mane ho
ilas samodok no baibain nia amá bolu Mau Samodo. Mau Samodo loroloron
toba le’u an besik iha ahi-matan. Bainhira iha festa ruma, Mau Samodo
nia amá bá partisipa no iha ne’ebá mós sempre mosu mane bonitu
ida-ne’ebé halo feto sira tuur la metin.
Iha loron ida, Mau Samodo hatete ba ninia amá, “Amá! Amá mós ferik
ona, sé mak atu tulun amá? Ha’u hanoin, presiza feto-foun ida hodi tulun
amá.” No nia amá hatán, Mau Samodo! Ó le’u an no dolar de’it iha rai
hanesan ne’e, sé mak hakarak ó!” Maibé, Mau Samodo husu beibeik to’o
nia amá konkorda.
Loron ida, Mau Samodo ho ninia amá bá husu feto atu kaben ho Mau
Samodo. Sira tama husi uma ida bá uma seluk no ninia amá husu, “Sé mak
hakarak kaben ho ha’u-nian oan-mane?” Feto barak mak hatán katak lakohi kaben tanba Mau Samodo ne’e dolar de’it. Iha mós
família ida-ne’ebé, iha oan feto-raan na’in tolu. Bainhira Mau Samodo nia amá husu, oan-feto dahuluk no daruak lakohi no hatán,
“Ai…! Sé mak hakarak kaben ho mane ida-ne’ebé dolar de’it ne’e.” Ho nune’e sira husu fali ba oan-feto ikun, “Ikun, ó hakarak
kaben ho Mau Samodo ka lae?” Feto ikun hatán, “Laiha buat ida, ha’u hakarak kaben ho nia, maski nia le’u an no dolar de’it.”
Mau Samodo ho nia família lori feto-ikun mai hela hamutuk no feto-ikun mós hadomi
tebes Mau Samodo ho nia amá.
Iha loron ida, Mau Samodo nia amá ho nia ferik-oan bá festa, maibé Mau
Samodo hela iha uma. Bainhira sira bá tiha festa, Mau Samodo nakfila
an ba mane bonitu ida no tuir mós bá festa ne’e. Iha festa laran, Mau
Samodo tuur hateke malu ho nia ferik-oan no sempre husu lisensa
ba nia amá molok dansa ho nia ferik-oan. Ida-ne’e akontese
beibeik iha festa sira ne’ebé sira partisipa. Bainhira Mau
Samodo nia amá ho ferik-oan fila hosi festa, sira seidauk
konta buat ida, maibé Mau Samodo sempre ko’alia saida
de’it mak akontese iha festa. Iha ne’ebá, nia ferik-oan hahú
deskonfia.
Liu tiha semana ida, sira hetan tan konvite. Hanesan baibain,
Mau Samodo hela iha uma no nia ferik-oan ho nia amá maka bá.
Iha dalan klaran, nia ferik-oan haruka nia banin-feto bá uluk festa no
nia subar tiha hodi hafuhu ba uma. Derrepente, nia rona tarutu no haree ema loke odamatan. Iha ne’ebá, nia haree mane bonitu
ida sai hosi uma-laran, halo nia hakfodak no husu ba nia an rasik, “Aiaa…! Sé maka mane bonitu ne’e?” Bainhira Mau Samodo sai
bá tiha festa, nia ferik-oan tama ba uma-laran haree Mau Samodo nia kulit latan hela iha ahi matan ninin, halo nia ferik-oan
hakfodak tebes hodi dehan, “Afinál, Mau Samodo ne’e mane bonitu ida.” Hafoin ne’e, nia ferik-oan foti Mau Samodo nia kulit lori
ba subar tiha no nia mós tuir sira bá festa. Hanesan baibain, Mau Samodo mós husu nafatin nia ferik-oan hodi dansa. Iha dansa,
nia ferik-oan komesa hakohak metin Mau Samodo tanba nia hatene ona katak ne’e nia la’en.
Bainhira nia ferik-oan haree Mau Samodo laiha ona iha festa, nia ferik-oan komesa bolu nia banin-feto atu fila ona bá uma.
To’o iha uma, sira bolu Mau Samodo atu loke odamatan, maibé nia la hatán tanba atrapalla buka hela nia kulit.
Tanba hein kleur liu, nia amá dudu odamatan no
odamatan mós nakloke. Sira hakfodak haree mane
bonitu ida hamriik hela. Sira dehan, “Afinál, ó mak
durante ne’e mosu iha festa, tanba ne’e ó sempre
hatene saida de’it mak akontese iha festa ne’ebá.”
Iha momentu ne’ebá, Mau Samodo labele
nakfila an ona ba Samodok. Nia husu atu sira
tenke subar nia kulit iha tahu ka besik bee.
Nia ferik-oan mós halo tuir saida maka
Mau Samodo hateten. Iha dadeer, fatin ne’ebé
subar Mau Samodo nia kulit, nakfila an ba uma
andar ida-ne’ebé furak tebes. Ikusmai, sira moris
haksolok iha ne’ebá no Mau Samodo ho ferik-oan
hetan oan-mane ida-ne’ebé moris mai ho marka fulan iha reen-toos.
