Grupu Klibur Feto Maluk harii iha 2007.Objetivu harii atu hadi’a ekonomia
membru sira, liuhusi muda ai-han lokál sai ai-han komersiál iha merkaduria.
Grupu ne’e halibur feto maluk sira iha sira-nia suku, hodi promove sira-nia abilidade no matenek.
Sira mai ho sira-nia kriatividade rasik hanesan; Homan luhu, lafatik no seluk tan. Produtu sira-ne’e fa’an hodi hetan
osan, balun sira rai ba kofre, balun sira uza ba nesesidade família. Sira mós hetan osan husi te’in hahan ne’ebé ema hameno.
Sira iha koperativa kréditu ki’ik ba membru sira ho funan ki’ik. Ezemplu: Membru ida foti osan
US$100, nia funan US$ 2.00.
Sira rai osan ba kofre grupu nian kada fulan US$ 2.00, ida-ne’e hanesan; Kritéria ida ba membru
hotu atu kumpri.
Nune’e, sira-nia koperativa bele hetan sustentabilidade ba oin.
Maski ho interese no nesesidade la hanesan entre membru sira, maibé feto maluk sira-ne’e iha hanoin
ne’ebé hanesan fiar no rona malu, rezolve problema hamutuk hodi hetan solusaun.
Produtu ne’ebé sira fa’an mak hanesan; Kripik hudi, ai-farina, foos, talas, xá ai-lia, marmelada fore-rai no bolu ai-farina.
Lia-menon:
“Inan feton sira, karik imi iha abilidade, koko buka malu hodi fahe hanoin ba malu. Hakbesik ba parte governu
hodi hato’o koñesementu ne’ebé ita iha ba sira.
Iha mós grupu Prezidente Jéneru no Pontu Fokal CCITL (Câmara de Comêrcio de Indústria de Timor-Leste) iha
munisípiu ida-idak. Nune’e, bele hetan dalan kona-ba oinsá bele hahú harii ita-nia grupu.”
Husi susesu hirak-ne’e, maka grupu Klibur Feto Maluk bele hetan apresiasaun husi Prezidente Repúblika ba prémiu Nutrisaun Prezidente iha 2015.
Foti Husi: Lafaek ba Komunidade, Ed. 2/2021
