Maria Moniz da Silva, membru komunidade
iha aldeia Aiasa, Bobonaro. Nia mós nu’udar
manorin ida iha EBF 1.2 Dom Armando Aiasa.
Durante ne’e, mana Maria simu Revista
Lafaek manorin no komunidade. Iha nia
hela fatin sira hetan de’it informasaun husi
Revista Lafaek tanba laiha tan jornál seluk.
Mana Maria iha oan na’in-lima. Na’in-haat eskola ona no ida
ki’ik ho idade tinan 4 labele bá pre-eskolár tanba distánsia
bá eskola dook tebes. Mana Maria deside atu hanorin nia iha
uma.
Nia hetan informasaun kona-ba “Hakarak oan hatene lee”
iha Revista Lafaek ba Komunidade edisaun 1/2020. Nia uza
métodu ne’e atu hanorin nia oan. Rezultadu maka ki’ikoan ne’e
bele koñese dezeñu no letra sira maski sei hetan apoiu husi nia
amá no Ikusmai nia bele forma ona letra.
Mana Maria sente kontente tebes tanba nia bele haree no lee
informasaun sira iha Revista Lafaek, liuliu sempre aprende no
prátika hamutuk ho oan sira.
“Ha’u baibain uza Revista Lafaek ba
Komunidade hodi hanorin ka aprende
hamutuk ho ha’u-nia oan. Ha’u hanorin tesi
letra tuir dezeñu sira. Ami tesi letra atu
forma sai liafuan. Daudaun ne’e ha’u-nia oan
ki’ik bele ona koñese letra no nia bele forma
letra sai liafuan.” Dehan Mana Maria.
