Maun Nick Borthwick hanesan Adjunto Embaxaidór Nova-Zelandia iha Timor-Leste ka Head of New-Zealand Development Program iha Timor-Leste halo ninia vizita mai iha CARE Internasionál iha Timor-Leste, espesialmente mai vizita Projetu Revista Lafaek.
Maun Nick nia vizita ida ne’e akompaña husi Maun Augusto Ferreira Soares, hanesan Senior Development Program iha Embaixada Nova Zelandia.
Iha vizita ida ne’e Maun Nick hateten katak, pela primeira vez mai iha CARE nia edifisíu no kontente loos bele iha sorumutu ho ekipa Revista Lafaek. Nia kontente tanba ekipa halo preparasaun no simu nia ho di’ak ho tara tais tuir lisan Timor nian, bele hasoru ki’ik oan sira ne’ebé sai hanesan manan na’in iha kompetisaun Dezeñu no Poesia.
Maun Nick kontente hodi rona kona-ba projeitu ninia lalaok durante ne’e husi jerente produsaun, implementasaun, monitorizasaun no evaluasaun no Lafaek Empresamentu sosiál. Iha sorumutu ne’e haree hamutuk video dokumentáriu kona-ba aniversariu Revista Lafaek ba dala 20. Maun Nick nia dezezu ba ekipa katak kontinua servisu di’ak no servisu hamutuk iha tinan tuir mai.
Iha vizita ida ne’e, partisipa mós husi Mana Alison hanesan Asistente Diretór País CARE internasionál iha Timor-Leste, Mana Yeni hanesan Diretóra Rekursu Humanu, ekipa Revista Lafaek no Alin manan na’in ba kompetisaun Poesia ho Dezeñu ne’ebé akompaña husi sira nia Inan-Aman.
