Aldeia Nunuhou, Suku Fatukesi ne’ebé nia distánsia dook husi
Liquiça Vila no komunidade barak maka moris nu’udar to’os-na’in.
Iha aldeia ne’e, Maun Lafaek dada-lia ho Maun Isac Mendonça
Menezes, idade 32, kona-ba nia atividade loroloron nian iha uma
hamutuk ho nia família.
Ema barak mak sei lori kostume uluk to’o agora, katak mane mak
xefe família no feto mak tama dapur. Maibé, Maun Isac nia hanoin
la hanesan. Tanba, tuir nia hanoin, serbisu ne’ebé halo iha umalaran
hanesan; te’in, fase-ropa no fó-han oan sira, ne’e serbisu ida
ne’ebé normál ba mane sira atu halo. Nia la’ós halo serbisu uma
nian de’it. Maibé, nia mós estuda hamutuk ho nia oan sira iha uma.
“Dalaruma, ha’u-nia mane maluk sira haree no dehan ha’u, maibé ha’u
dehan ba sira katak, ida-ne’e normal no ha’u nunka moe no fóti ida-ne’e sai
ba problema.” Dehan Maun Isac.
Nia hatutan tan katak, “Ita tenke muda hahalok hirak ne’e, sai xefe
ba família, la’ós atu buka osan de’it maibé oinsá maka fahe knaar hanesan iha uma-laran.”
“Serbisu ne’e la’ós feto de’it mak bele halo.
Maibé, mane mós tenke halo. Ita halo tuir
kostume uluk, maibé kostume ne’e ita ema mak
halo no ita mós bele halakon, ezemplu; feto
mak prepara hahán ka fase-roupa, tuir loloos
serbisu ida-ne’e feto ho mane bele halo hotu.”
Dehan Maun Isac ho hamnasa.
Kuidadu oan-sira
no ajuda feen,
importante tebes.
Lia Menon:
“Ba ha’u-nia kolega mane sira katak, ita tenke hadomi ita-nia feen ho oan sira, tenke
kuidadu no ajuda ita-nia kaben tanba ida-ne’e importante tebes. Labele moe atu halo
atividade ne’ebe feto sira baibain halo. Labele fó serbisu todan ba feto, husu ba imi atu
fahe serbisu uma nian ho hanesan.”
Ema ne’ebé fó sasin:
Silveiro Pereira da Silva hatete katak, “Isac, ema ida-ne’ebé
pasiénsia. Loroloron, nia mak haree nia oan sira, karik
labarik toba ona, entaun nia tenke-fase ropa no prepara
hahán.”
Maun Isac nia atividade rasik, inspira Maun Silveiro ho nia
viziñu sira seluk. Dalaruma nia mós ajuda nia kaben iha
serbisu uma-laran nian, “Bainhira ha’u-nia kaben bá tiha
to’os ka fatin seluk, ha’u maka prepara hahán ba oan sira.
Ha’u hanoin knaar ne’e feto ho mane bele halo hotu.”
