Loron Mundiál Feto Hamutuk Ho Joven Sira
Belun sira! iha loron Sábadu data 14 fulan Marsu ekipa Lafaek Learning Media (LLM) ho Ekipa Gender husi CARE internasionál iha Timor-Leste selebra loron mundiál feto hamutuk ho grupu joven sira husi Timor-Leste Youth for Peace, Uma Amerika, Rypen no estudante universitáriu seluk, hamutuk na’in 28 (Feto 19 no mane 9) iha CARE ninia edifísiu Bairro-Pite. Atividade ne’e hala’o iha dadeer tuku 10 no ramata iha 12.00 meiudia, atividade ida ne’e mós hetan partisipasaun ativu husi joven sira.
Tema ba atividade ida ne’e mak “FAHE ESPERIENSIA IMPORTANSIA IGUALDADE JÉNERU BA MUDANSA HAHALOK”.
Objetivu husi atividade ne’e mak hodi Selebra loron mundiál feto, hodi Hasa’e joven sira ninia koñesimentu no komprensaun ba importánsia loron mundiál feto no importánsia husi igualdade jéneru no mós hodi hasa’e joven sira ninia koñesimentu ba igualdade jéneru liu husi kria espasu ba diskusaun kona-ba norma sosiál.
Iha atividade ne’e mós ekipa hala’o diskusaun hamutuk ho joven sira uza aproximasaun global CARE nian ba Analiza Sosiál no Asaun. Diskusaun ne’e halo relasiona ho hanoin, fiar no esplora liu tan partisipante sira ninia opiniaun no fó oportunidade atu refleta ba sira ninia atitude rasik kona ba dezigualdade jéneru.
Joven sira mós espresa sira nian komprensaun ne’ebé di’ak tebes ba asuntu igualdade jéneru, husi diskusaun ida ne’e joven feto ida hatete katak igualdade jéneru ne’e oportunidade ba ema feto no mane la haree ba sira ninia kondisaun fíziku ka moris.
Durante diskusaun uja vota ho ain rasik, joven sira maioria la konkorda katak feto deit mak bele / tenke tau matan ba labarik ho razaun hirak katak kuidadu labarik ne’e feto no mane ninia knaar nu’udar inan no aman, bele ajuda malu ba hakmahan servisu uma laran entre fen no la’en, maun no alin.
Liga ho asuntu Violénsia Bazeia ba Jéneru, maioria la konkorda ho deklarasaun ne’ebé hatete katak “asepta atu baku ita nia doben bainhira nia ko’alia ho mane seluk”, sira la konkorda ho razaun; feto nudar humano iha direitu atu halo komunikasaun ho se deit, bainhira mane ida baku ninia doben ne’e tipu ida husi violénsia fíziku no mós afeta ba psikolojia no hadomi la signifika katak tenke baku no kontrola.
