Tempu bailoro to’o ona, komunidade iha aldeia Naroman susar tebes atu
hetan bee moos. Iha aldeia ne’e, komunidade hotu uza bee-matan ki’ikoan
ida de’it.
Tiu Pedro ho nia família mós uza hotu beematan ne’e ba nesesidade uma-laran
hanesan; Fase-bikan, te’in no hariis.
Hanesan feen ne’ebé maka di’ak, Tia Maria sempre bá kuru bee ho distánsia ne’ebé dook. Maske kole, maibé Tia Maria hatudu oin-midar nafatin. Hafoin bee sira iha masa nakonu hotu, Tia Maria mós lori fali roupa fo’er sira hodi lori bá fase iha bee-matan.
Bainhira fila husi bee-matan, Tia Maria haree bee ne’ebé nia kuru iha masa mamuk
hotu kedas. Tia Maria hakfodak, “Nu’usá maka bee iha masa mamuk hotu kedas ne’e?
Sé mak estraga?” Nia ko’alia ho hirus. Tiu Pedro hatán, “ Ha’u mak uza ba hariis hotu, ne’ebé
nu’usá?” Tia Maria sente triste loos. Nia dehan, “ Ha’u kuru bee la kolen ka?” Tiu Pedro hatán, “Ne’e ó-nia responsabilidade.
Nu’udar feen, ó maka tenke serbí ha’u!” Liafuan ne’e, halo Tia Maria triste liután.
Ho nervozu, Tiu Pedro la’o sai bá li’ur. Bainhira hamriik hela iha uma oin, Tiu Pedro haree Tiu Toi hi’it hela bee.
Tiu Pedro hakbesik ba hodi husu, “Tanbasá ó tenke kuru bee, ne’e feto nia serbisu.” Tiu Toi dehan, “Labele hanoin hanesan
ne’e, nu’udar feen ho la’en ita tenke serbisu hamutuk. Labele fó serbisu todan ba ita-nia feen.
Ita tenke tulun ita-nia feen halo serbisu iha uma-laran atu nune’e ita-nia família moris kontente.”
Tiu Pedro arrepende ho hahalok ne’ebé nia hatudu ba Tia Maria.
Bainhira fila bá uma, Tiu Pedro mós husu deskulpa ba Tia Maria. Komesa ne’e kedas, Tiu Pedro ho Tia Maria fahe serbisu uma-laran hanesan ba malu.
Ikusliu, Tia Maria haksolok tebes tanba nia kaben halo mós serbisu uma-laran ona, no
sira-nia família moris haksolok no laiha ona problema hanesan uluk.
