Iha tempu uluk, lekirauk ida ho laho ida hakarak
koko sé maka sorte liu.
Lekirauk hamanasa tebes, tanba laho isin ki’ik.
“Haha…!” belun atu koko fali ha’u ne’e!” Lekirauk
gaba an. Laho nonook de’it.
Loron ida, sira hahú koko forsa.
Sira lalin ai-maran no du’ut mai bou iha rai-kuak
ibun. Sira hahú halo kompetisaun. Iha tempu
ne’ebá, laho maka tama uluk ba rai-kuak no lekirauk bou ai-maran no ai-tahan sira
hodi sunu, “Sé maka sei moris nia maka manán.” Lekirauk dehan.
Laho dolar tama dadaun bá rai-kuak ne’e.
Ahi-lakan ho suar maka’as, lekirauk bidu loos
katak laho sei mate. Maibé laho hatene, nia
ke’e rai borus no nia subar iha lidun seluk hodi
ahi la kona nia.
Liutiha oras balu lekirauk hasai ai-maran hodi
hateke, laho matan lakan hela. “Aiii…Ó mós
maka’as e…!” Lekirauk dehan ho hakfodak.
Lekirauk komesa fuan tuku-tuku, tanba tempu ba nia atu tama fali.
Lekirauk dolar tama bá rai-kuak. Laho sunu husi rai-kuak ibun. Liu minutu rua
de’it, lekirauk hakilar tanba ahi-suar no manas tebes.
“Belun…hasai lailais, lae ha’u mate ona!” Lekirauk hakilar.
Laho hasai ai-maran sira no hetan lekirauk bulelu no toba hela
iha rai. “Haha…keta gaba an demais, maske ha’u ki’ik maibé
ha’u mós forsa.” Laho ko’alia.
Iha tempu ne’e kedas lekirauk husu deskulpa.
Sira sai belun di’ak fali no la koko malu tan.
Istória ne’e mai husi; Albano Marco Jibral da Costa, Klase 4, EBF Taroman (EMIS:129), Fatululik, Covalima,
Modifika husi ekipa Lafaek.
