Projetu Lafaek Learning Media, hanesan projetu edukasaun ne’ebé harii husi CARE Internasionál iha Timor-Leste no serbisu hamutuk ho Ministériu Edukasaun, Juventude no Desportu (MEJD) ho apoiu husi Programa Asisténsia Nova Zelándia kolabora hamutuk hodi serbí ba kualidade edukasaun ne’ebé di’ak iha Timor-Leste, liuhusi prodús no distribui Revista Lafaek sira bá eskola iha Timór laran tomak dala tolu (3) kada tinan, hodi tulun no hasa’e abilidade no kuñesimentu iha área oioin.
Revista Lafaek iha tipu haat (4):
- Lafaek Ki’ik: Fahe ba kada kanorin hotu iha Edukasaun Pré-Eskolár no Ensinu Báziku, klase 1-2 iha Timór laran tomak. Ninia konteúdu foka liu ba dezenvolvimentu literasia no numerasia báziku, abilidade motóriku, lójiku, saúde ijiéne, liuhusi dalan atrativu tuir mundu labarik nian. Agora dadaun Revista Lafaek Ki’ik fahe ba kanorin 111,028 iha territóriu Timór laran tomak.
- Lafaek Prima: Fahe ba kanorin hotu iha Ensinu Báziku, klase 3-6. Ninia konteúdu foka liu ba dezenvolvimentu literasia no numerasia avansadu no introdusaun báziku kona-ba siénsia sira no mós introdusaun ba lian Portugés. Revista ne’e fahe ba kanorin 132,492 iha territóriu Timór laran tomak.
- Lafaek ba Manorin: Fahe ba kada manorin hotu iha Edukasaun Pre-Eskolár no Ensinu Báziku, klase 1-6. Ninia konteúdu foka ba iha metodolojia hanorin ne’ebé sentradu ba iha Kanorin sira no mós sai hanesan materiál didátiku ne’ebé suporta kurríkulu nasionál Ministériu Edukasaun, Juventude no Desportu Timor-Leste. Revista ne’e fahe ba manorin 12,186 iha territóriu Timór laran tomak.
- Lafaek ba Komunidade: Fahe ba uma-kain sira iha área rurál no remota sira. Ninia konteúdu foka liu ba informasaun báziku sira hanesan saúde, nutrisaun no ijiene, agrikultura, negósiu ki’ik no kuidadu labarik hodi tulun harii no hadi’ak kondisaun ekonomia família nian. Revista ne’e fahe ba uma kain 105,060 (50% populasaun iha Timor-Leste) iha área rurál no remotas sira.
Atu dezenvolve konteúdu iha kada edisaun husi Revista Lafaek, Ekipa Produsaun iha CARE hahú ho sesaun diskusaun liuhusi dezenvolve mapamentu konteúdu hodi aliña mensajen xave sira ho matadalan kuríkullu Ministériu Edukasaun, Juventude no Desportu nomós mensajen xave sira husi programa longuprazu CARE Internasionál iha Timor-Leste nian, hanesan; Edukasaun, Feto nia lian, Hakbiit feto-nia ekonomia, Saúde Sexuál, Maternál no Reprodutiva.
Nune’e mós, Ekipa LAFAEK hala’o konsultasaun Regulár kada edisaun liuhusi Advisory Board Meeting (Reunião do Conselho Consultativo) kada edisaun ho ekipa tékniku Ministériu nian hanesan; Diresaun Nasionál Edukasaun Pre-Eskolár, Diresaun Nasionál Edukasaun Ensinu Báziku, Diresaun Nasionál Parseria e Kooperasaun, Diresaun da Unidade Kurríkulu Avaliasaun Eskolár, INFORDEPE no Embaixada Nova Zelándia, hodi revee no asegura katak mensajen xave sira aliña duni tuir matadalan kurríkullu nasionál, antes aprova hodi ba imprime finál.