Joven Inspiradora!
Mai koñese ita-nia joven emprezária susesu Silvia Correia de Araujo, tinan 28, ne’ebé remata de’it nia eskola iha nivel sekundária, maibé bele ona fó servisu ba graduadu sira husi universidade liuhusi negósiu ne’ebé nia nain rasik harii. Nia mós sai hanesan treinadora ba negósiu no mentora ba joven sira ne’ebé hakarak investe ba sira-nia an liuhusi negósiu ki’ik sira iha UNDP Knua Juventude Fila-Liman.
Iha tinan 2016, Silvia serbisu hanesan tékniku ikan iha Gleno, Ermera. Iha ne’ebá, Silvia nota katak komunidade sira barak mak seidauk asesu ba modo musan no hahán ikan ne’ebé ho kualidade di’ak. Nune’e maka nia harii ona nia negósiu sosiál ho naran SDAL, Unipessoal Lda. Ho objetivu atu tulun komunidade agrikultór sira iha Timor-Leste hodi hasa’e rendimentu no produsaun rai laran, liuhusi fornese modo musan no hahán ikan.
Agora dadaun, ninia negósiu fornese ona hahán ikan ba grupu agrikultór sira iha Gleno, Maubisse, Hera, Manatuto, Liquiça no ba ema sira ne’ebé presiza.
Hanesan treinadora no mentora iha UNDP Knua Juventude Fila-Liman, Silvia mós tulun joven sira liuhusi fó treinamentu no akonselamentu negósiu ba joven sira ne’ebé hakarak tebes atu investe iha negósiu ki’ik, liuliu iha agrikultura no peskas. Liuhusi negósiu ki’ik ne’ebé iha, joven sira kria ona servisu ba sira-nia an no ba kolega sira seluk hodi hamenus dezempregu iha rai laran.
Silvia mós sempre ativu iha eventu sira hodi bele inspira, no motiva joven atu labele hein no tane liman ba ema seluk, maibé husu ba ita-nia an, sé nia bele nu’usa ha’u labele.
Dezafiu boot ne’ebé Silvia hasoru maka tempu, maibé nia sempre halo planu ba nia serbisu no maneja nia tempu ho di’ak hodi atinji nia objetivu. Ikusmai, Silvia bele susesu iha serbisu sira hotu ne’ebé nia hala’o.
Mensajen ba feto maluk sira iha Timor-Leste;
Ba feto maluk sira; Sé ita hakarak susesu, ita presiza badinas hodi serbisu maka’as, hatene maneja tempu ho di’ak, aprende barak no haraik-an.
Husu ba inan-aman sira hotu, atu enkoraja ita-nia oan feto-mane hodi bá eskola no serbisu mós iha to’os. Agrikultór la’ós serbisu ema beik no fo’er ni’an, maibé serbisu ita hotu nian.
Investe agora mak imi sei susesu iha futuru.
Hakerek na’in: Ekípa Lafaek.
