Tiu João ho tia Joana, iha oan-mane na’in-tolu. Mau Tersa tinan 2, Mau
Kinta tinan 4, hahú eskola iha Pré-Eskolár no Mau Gunda tinan 6 eskola
ona iha ensinu báziku klase 1. Tiu João serbisu hanesan to’os-na’in no tia
Joana nia serbisu loroloron maka prepara ai-han no lori oan sira bá eskola.
Iha sira-nia família, konsidera katak te’in no halo serbisu uma-laran ne’e
feto nia serbisu, maski tia Joana ho kondisaun isin-rua hela.
Dadeer de’it, tia Joana prepara matabixu. Hafoin ne’e, tia Joana lori Mau
Kinta ho Mau Gunda bá eskola no kous ho Mau Tersa. Bainhira fila mai uma,
nia mós prepara ai-han ba nia kaben ho nia oan na’in-tolu no tuir prátika
husi bei’ala ho komunidade sira-nia hanoin katak, feto fó prioridade ba mane
no oan-mane sira mak han uluk. Loroloron, tia Joana tenke han ikus no
dala ruma nia han etu ho modo ne’ebé uitoan de’it, tanba modo ne’ebé nia
prepara, nia kaben ho ninian oan na’in-tolu mak han.
Loron ida, tia Joana sente moras iha hirus-matan no oin-halai. Tiu João ho
nian oan sira, lori tia Joana bá konsulta iha Sentru Saúde.
Doutora esplika, atu inan ho bebé hetan isin-di’ak no saudável, presiza han
ai-han nutritivu hanesan; Ikan, na’an, manu-tolun, tahu, koto, lakeru,
fore-talin, batar, etu, modo-tahan, ai-fuan, susubeen no hemu bee barak.
Inan isin-rua mós labele kaer serbisu todan, tenke han tuir oras no deskansa
barak. Doutora esplika tan, benefísiu planeamentu famíliar tulun
inan-aman hodi fó espasu ba oan, tanba di’ak ba inan no oan ninia saúde.
Oan sira mós bele hetan domin husi inan-aman no fó tempu ba inan sira hodi
kuidadu sira-nia saúde.
Hafoin fila husi Sentru Saúde, tiu João no tia Joana tuur hamutuk no deside,
husi ohin ba oin, sira na’in-rua sei fahe knaar no responsabilidade hanesan. Tia
Joana dehan, “João, agora ba oin, ha’u-nian serbisu maka lori labarik na’in-rua
ba eskola no Ó mak haree Mau Tersa no halo mós serbisu balun iha uma-laran.”
Hafoin ne’e, sira fahe knaar no responsabilidade hanesan, sira mós konkorda
katak, sira tenke han hamutuk iha meza ho ai-han ne’ebé hanesan.
Ikusmai, sira-nia família moris ho haksolok no tia Joana mós
partu ho seguru, bebé mós isin-di’ak no saudavel.
Tiu João ho tia Joana mós deside, atu fó espasu ba oan
nune’e, sira bele iha tempu natoon hodi kuidadu sira-nia
saúde hodi moris saudavel, armonia no sai ezemplu di’ak ba
oan sira.
