Ha’u hanesan foin-sa’e ida ne’ebé remata de’it iha eskola sekundário no husi família agrikultór. Ha’u labele kontinua estudu ho razaun família laiha kbiit atu suporta. Maske nune’e, ha’u la lakon esperansa atu hadi’a moris liuhusi agrikultur. Iha momentu ne’ebá, ha’u koko atu buka servisu hodi aumenta esperiensia. Ikusmai, servisu hanesan Barista iha kafé Letefoho.
Iha Kafé Letefoho, ha’u aprende barak kona-ba oinsá prodús kafé no serve kafé ba ema ho dia’k no kualidade.
Liuhusi esperiénsia ne’ebé iha ona, ha’u fi’ar an katak sei halo buat ruma iha futuru.
Tuir ha’u-nia haree katak, ema husi rai li’ur maka mai prodús fali ita-nia kafé no fa’an fali ba rai li’ur ho folin ne’ebé aas, tansá mak ita labele?
Ho nune’e ha’u, deside atu para servisu husi kafé Letefoho. Iha tinan 2015 iha ona ideia atu komesa, maske osan laiha, maibé ha’u koko atu hatudu liuhusi kapasidade ne’ebé ha’u hetan, entaun bainaka sira ne’ebé mai hemu kafé, sira mós fó hanoin mai ha’u atu hetan fundus. Ikusmai, ha’u hetan oportunidade bá servisu iha Australia durante fulan 6, hanesan ku’u ai-fuan. Fundus uitoan ne’ebé ha’u hetan, uza sosa sasán ne’ebé suporta hodi prodús ona kafé hanesan; Balde, rede no sasán sira seluk.
Ha’u mós foin harii sentru prosesamentu kafé hodi hanorin família no komunidade oinsá prodús kafé ne’ebé kualidade, hahú husi ku’u to’o habai no fa’an ba merkadu. Ha’u hahú negósiu ne’e ho fundus $ 1,200, ne’e inklui gastus ba ekipamentu sira hanesan; Pakote no stiker, hola rede no balde. Maibé, seidauk to’o tinan, ha’u halibur ona osan hamutuk $4.000 dolar Amerikanu.
Tuirmai, kafé sira ne’ebé ha’u prodús husi prosesu ku’u to’o habai;
Ezemplu:
Prosesamentu kafé ne’ebé kualidade:
- Halo rede hodi habai kafé.
- Ku’u kafé tasak mai tau iha bee hodi hasai tiha namlele, tanba laiha kualidade.
- Dulas kafé no labele budu no uza rede hodi habai iha loro-matan.
Ami mós halo prosesu kafé ho tipu oioin. Ida maka kafé naran bani-been. Prosesu maka hanesan:
- Ku’u kafé kulit-mean.
- Hili nia tasak de’it.
- Dulas tiha labele budu ka fase. Habai de’it ho nia goma tanba nia kulit midar, bele halo kafé sai midar hanesan bani-been.
- Habai to’o maran tiha, hasai nia kulit mutin no lori ba sona.
Ikusmai, ami halo promosaun ba sosa-nai’n sira. Hola 2 no gratuita 1. Ami mós fa’an ona pakote sira tuir nia tamañu ho folin ne’ebé la hanesan;
Ha’u agradese tanba kafé orgániku Atsabe maka sai primeiru lugar iha Festival Kafé iha Dili, tanba kualidade kafé Timór nian. Fatin ami hatama produtu kafé maka merkadu lokál hanesan supermerkadu Pateo, no restaurante balun iha Dili laran. Merkadu Internasionál mak hanesan Reinu Unidu (Inglatera) no Nova Zelándia.
Agora ami atu haruka tan kafé tonelada 1 ba Reinu unidu.
