Mana Imelda Felicyta Ximenes Belo, eskola iha UNTL,
departamentu Enjeñaria Sivíl, Fakuldade Enjeñaria, Siénsia no
Teknolojia (sigla portugés FECT). Mana Imelda, nu’udar feto
foin-sae ida-ne’ebé reprezenta Timór hodi partisipa kompetisaun
natasaun iha Tokyo Olympic Games 2020.
Mana Imelda haktuir, “Bainhira ha’u sei ki’ik, mehi hakarak sai
doutora. Hafoin ha’u boot no hetan bolsu estudu nani nian bá iha
nasaun Tailandia, iha momentu ne’ebá mak ha’u-nia mehi doutora
nakfilak fali ba nadadór.”
Mana Imelda hatutan, “Susesu ne’ebé ha’u hetan mak esperiénsia
oinsá atu prepara atleta sira, aprende tékniku nani nian no haree
ema nia infraestrutura. Ha’u konsidera esperiénsia hirak-ne’e
hanesan osan-mean hodi hadi’a liután ha’u-nia talentu.”
Hanesan timoroan no feto ida, sente orgullu tanba bele lori Timór hodi partisipa iha
eventu natasaun oioin hanesan: 14th FINA World Swimming Championships (25m)
China, 18th Asian Games 2018 (50m) Indonesia, 30th South East Asian Games 2019
(50m) Philipina no Olimpic Games Tokyo 2020 (50m) Japan. Ha’u mós sempre
hetan apoiu hosi kolega, família no treinadora ne’ebé
sempre dehan, “La’o nu’udar eroi nia lalatak, hanoin
Bandeira iha ulun no Hino Nasionál iha fuan.”
Dehan mana Imelda.
Mana Imelda hatutan, “Atu sai atleta no lider ida, ita
tenke fahe tempu hanesan entre eskola, treinu ho família
no tenke iha mehi. Se ita iha mehi, tenke iha mós asaun
tanba ho asaun mak ita bele halo ita-nia mehi sai
realidade. Involvementu feto iha prosesu lideransa ne’e
importante tebes, liuliu iha parte desportu. Ko’alia
kona-ba igualdade jéneru maka, feto mós bele hola parte
iha desportu. La’ós atu liu mane sira, maibé feto mós tenke
hatudu katak sira mós bele hola parte iha eventu desportivu sira.”
Mensajen:
Husu ba alin sira, atu labele ta’uk hodi koko saida mak imi bele no hakarak halo, tanba
desportu la haree ba fíziku maibé mentalidade no vontade di’ak atu aprende.
