Ha’u-nia naran Ercio Assis Belo. Ha’u nia tinan 11. Ha’u eskola iha EBFC1 Uaisa, Postu Administrativo Baucau, Munisipiu Baucau.
Ami-nia eskola sempre simu Revista Lafaek husi CARE iha Timor-Leste tinan ida dala tolu (3). Revista Lafaek ne’ebé ha’u simu maka Revista Lafaek Prima.
Ha’u sente kontente loos bainhira ha’u simu Revista tanba ha’u bele lori ba uma hodi lee no aprende.
Depois dé ha’u ho kolega sira simu tiha Revista ami lee hetan kreatividade iha Revista laran kona-ba halo bee turuk husi masa uzadu.
Iha uma, ha’u-nia avoo haruka ha’u no ha’u-nia alin halo tuir ezemplu ne’ebé hatudu iha Revista Lafaek nia laran tanba kreatividade ne’e fasil no kapas loos.
Materiál sira ne’ebé maka uza hodi halo bee turuk ne’e ami hili de’it maka hanesan, masa mamuk ne’ebé maka sai ona hanesan lixu. Ami lori mai no ami fase tiha maka hodi halo bee turuk husi masa uzadu ne’e hodi bele rega ai-funan iha uma huun.
Ha’u hakarak estuda maka’as atu nune’e iha futuru bele sai Manorin hodi hanorin fali estudante sira.
Ha’u husu ba ekipa Revista Lafaek atu kontinua fahe nafatin Revista ba iha ami-nia eskola.
Se bele karik aumenta tan konteúdu Istória, Saude no Kreatividade atu ami kanorin sira bele aprende nafatin no halo tuir iha uma.
Intervista Husi: Lucio Alves (MEL, Revista Lafaek)
