Mikronegósiu Dezenvolvimentu Negósiu Iha Komunidade
Grupu HEK (Halibur Enjeñeiru Kriativu), harii iha fulan Abril, 2019. Grupu ne’e nia objetivu mak, hodi halibur kolega joven kriativu ne’ebé helik an hela hodi la hatudu sira-nia talentu ne’ebé iha ba públiku.
Grupu nia hanoin oinsá halo sidade Dili, sai hanesan fatin ne’ebé moos hodi dada ema husi estranjeiru atu mai vizita ita-nia rai. Tuir sira-nia haree lixu mós sai
hanesan problema ida. Ho nune’e, dalan maka oinsá ita bele halo resiklajen ka uza fali sasán ne’ebé ita soe ona hanesan, masa mamuk, plástiku, botir no sasán uzadu sira, hodi uza fali iha ita-nia moris loroloron.
Ami hahú ho fundus ne’ebé ki’ik $ 100 de’it, la hetan suporta husi ema seluk. Ami iha hanoin, di’ak liu hahú ho fundus ki’ik, hodi hatudu rezultadu ne’ebé di’ak duke tane liman maibé la implementa.
Atu ami-nia produtu folin lailais, ami sempre halo promosaun iha média sosiál hanesan; Facebook, diskontu ba presu, tuir espozisaun. Nune’e, ami-nia produtu bele folin lailais.
Ami tuir ona espozisaun iha; Timor Resort, Care Internasionál (LAFAEK), UE (Uniaun Europeia), UNDP no Nigth Market iha Timor Plaza.
Liuhusi atividade sira-ne’e, ami sente orgullu hanesan joven tanba bele hamutuk, maske ami husi munisípiu oioin ho koñesementu ne’ebé la hanesan.
Ami sempre rona-malu no simu kolega seluk nia ideia, hodi halo produtu sira-ne’e ho di’ak atu dada ema seluk nia matan.
Osan ne’ebé iha ami uza hodi sosa ekipamentu sira hanesan; Goma, arame, triplex no tinta. Membru sira-ne’e voluntáriu de’it, laiha saláriu. Maibé liuhusi espozisaun, karik ema sosa ami-nia produtu ami sei rai osan iha kofre grupu nian. Produtu ne’ebé sira halo rasik, osan sei fó ba sira.
Agora daudaun ami-nia fundus hamutuk $ 500, balun ami uza hodi sosa ekipamentu hodi kontinua halo produtu ne’ebé ema hameno atu sosa.
Iha futuru, ami sei halibur tan maluk joven balun ne’ebé remata ona estudu iha universidade, no mós seidauk hetan servisu. Grupu HEK halibur ema hotu-hotu iha área oioin atu sai kriativu no inovativu.
