Revista Lafaek, tuir ha’u-nia observasaun jerál
durante Revista Lafaek tama iha ami-nia
eskola tulun tebes kanorin no mós manorin sira.
Tanba hakerek ho liafuan simples no klaru. Tulun
manorin sira oinsá atu prepara materiál lokál.
Materiál lokál ne’e importante tebes atu tulun
manorin sira iha prosesu aprendizajen. Revista
Lafaek suporta hodi halo kompletu
materiál didátiku uza materiál lokál liga ho
kurríkulu. Revista Lafaek mós simplifika tan
Konteúdu iha kurríkulu liga ho planu lisaun
nune’e manorin sira bele komprende. Liuhusi
Revista Lafaek labarik sira aprende Literasia.
Sira mós bele uza hodi hanorin sira-nia alin iha
uma, tanba labarik balun seidauk eskola mós,
bele koñese ona letra balun no lee, maske la
liuhusi pre-eskolár. Sira mós hetan
Revista Lafaek ba komunidade, nune’e
nuudar inan-aman bele uza hodi hanorin oan
sira ne’ebé maka ladún koñese letra. Tanba
tempu iha uma barak liu no tempu iha eskola
uitoan de’it. Liuhusi Revista Lafaek la’ós konta
de’it istória maibé istória nakonu ho siénsia liuliu
ba klase 1 to’o 6 siénsia barak iha laran.
Revista Lafaek tulun simplifika tan kurríkulu
ensinu báziku nian.
Dezafiu ladún boot, kurríkulu iha lian ofisiál rua,
Tetun no Portugés. Oinsá manorin atu koloka
lian rua ne’e ho loloos. Manorin sira iha
ami-nia eskola ha’u orienta sira atu uza lian rua
ne’e hotu. Sira ne’ebé ladún komprende di’ak
lian Portugés ami sei diskute bainhira enkontru
(GTP), Ami fahe esperiénsia ba malu tuir
manorin ida-idak nia kapasidade no abilidade
ne’ebé iha hodi bele rezolve dezafiu.
Karik kanorin sira la komprende bele uza lian
Tetun no lian inan. Iha klase 4 to’o 6
komprende lian Tetun maibé klase 1 to’o 3 lian
Tetun sira ladún komprende uza lian inan hodi
tulun sira. Revista Lafaek mós tulun atu
hamenus ami-nia dezafiu liuhusi materiál lokál.
Karik iha kurríkulu materiál sira-ne’e la mosu
ami uza Revista Lafaek atu reutiliza materiál
sira-ne’e hodi kria sai materiál reziklazen
(husisasán uzadu).
Lideransa, ha’u seidauk hetan formasaun
kona-ba lideransa maibé hetan formasaun
kona-ba metodolojia, liuhusi esperiénsia
sira-ne’e kapasita ha’u-nia an hodi utiliza
abilidade ne’ebé hetan husi formasaun. Ha’u
orienta uluk manorin husi klase ida-idak, tanba
manorin klase maka reprezenta kanorin
sira-nia inan-aman. Iha ha’u-nia eskola ha’u fó
knaar no responsabilidade ba manorin
ida-idak hodi tau matan ba sira-nia sala
hanesan uma rasik. Bainhira klase moos no
saudável kanorin sira mós bele aprende ho
di’ak. Karik iha vidru ruma rahun manorin no
kanorin maka responsabel atu tau fali vidru
ne’ebé maka nakfera. Iha tempu rekreiu klase
ida-idak mantein klase ne’ebé moos.
Kanorin sira maka responsabel rasik ba sira-nia
lista prezensa.
Materiál, ha’u hanesan koordenadór ha’u
sempre tau matan ba manorin sira hotu
kona-ba oinsá atu prepara materiál. Materiál
sira balun ami sosa liuhosi subsídiu eskolár husi
governu no balun ami uza materiál lokál
hanesan; Fatuk, Ai-musan, Ai- kesak no seluk
tan. Ha’u baibain fó orientasaun atu buka
referensia seluk hodi fó apoiu ba manorin hodi
prepara planu ne’ebé di’ak. Husu ba
manorin sira lee beibeik hodi komprende
nune’e bele transforma ho loloos.
Lia-menon
Manorin na’in sira hotu tenke serbisu ho
konsiensia no responsabilidade. Sekarik
konsiensia no responsabilidade laiha susar
tebes. Atu halo mudansa tanba ita prepara
ema-nia oan hanesan ita-nia oan. Husu ba
koordenadór/a atu hakohak manorin hotu,
bainhira eskola ne’e haree furak no di’ak fila ba
manorin ho kanorin no mós kopera ho
inan-aman sira. Ne’e duni kualidade
governasaun iha eskola ne’e importante tebes.
Ami iha prinsípiu tolu ne’e mak hanesan:
Sentradu iha kanorin, Inkluzividade,
Partisipasaun Demokrátiku.
Manorin lee barak hodi prepara materiál sira
liga ho planu lisaun.
Belun Manuel Salsinha hanesan koordenadór
EBF, Emis 244. Matata, Railaco, Ermera. Hakarak fahe
nia esperiénsia kona-ba Revista Lafaek liga ho
materiál didátiku, lideransa, jestaun klase no
planu estratéjia ba rezultadu aprendizajen
