Tenente Marquita da Cunha, mai hosi família to’os-na’in no agora dadaun nia mak
asumi knaar nu’udar responsavel ba jéneru iha gabinete Xefe-Estadu Maijór
Jenerál F-FDTL
Uluk nia gosta forsa maibé la imajina atu sai forsa, tanba forsa ne’e iha treinamentu todan. “Ha’u sei ki’ik, mehi atu
sai advogadu maibé ha’u atu hili dalan fasil maka sai manorin.” Dehan Tenente Marquita.
Ho lailais nia hatutan, “Hafoin remata eskola sekundária, ha’u kontinua estudu iha UNTL iha área konstrusaun sivíl,
maibé, la konsege remata tanba problema família.
Ha’u mós para eskola no fila ba tulun família liuhosi fa’an kioske.”
Iha tinan 2002, bainhira instituisaun F-FDTL loke oportunidade ba foin-sa’e sira no nia mós bá koko.
“Ha’u la espera atu liu iha forsa, tanba iha momentu ne’ebá ha’u hanoin atu koko de’it maibe ikusmai ha’u liu
duni. Ha’u mós orgullu tanba sempre hetan promosaun ba ha’u-nia karreira profissionál. Promosaun dahuluk ba
Furriel, promosaun daruak ba postu 2 Sarjentu no promosaun datoluk ba postu Tenente hafoin remata
estudu iha nivel licenciatura Dep. Relasaun Internasionál, Fakuldade de Siénsia Sosiais e Humanas iha tinan 2016 Maibé seidauk bele dehan susesu tanba ha’u-nia serbisu foin mak hahú.” Hatán Tenente.
“Sai lider ida la’ós buat fasil, maibé presiza tempu no iha prosesu ne’ebé naruk tebes, atraveza dezafiu oioin.
Naturalmente lider balun iha kedas tanba sira bele lidera ona iha sira-nia família.” Dehan Tenente Marquita
“Atu sai lider ida presiza fiar-an, dixiplina, influénsia, responsabilidade, obidiente, lealidade, hatudu ezemplu
ne’ebé di’ak, rona barak no prontu simu krítiku sira. Lider ida-ne’ebé
maka di’ak saida maka nia ko’alia tenke refleta ba saida maka nia
halo.” Dehan Tenente Marquita.
“Dezafiu ne’ebé ha’u hasoru maka serbisu iha ambiente ida-ne’ebé maioria mane ho nivel koñesimentu la hanesan no oinsá mak ami bele konvense malu hodi bele serbisu hamutuk.” Hatán Tenente.
Nia mós hatutan tan, “Ha’u sempre hetan suporta husi ha’u-nia kolega mane sira no ha’u-nia kaben tanba nia mós hanesan ofisiál iha instituisaun F-FDTL. Nia mós tulun ha’u halo serbisu uma-laran tanba nia komprende di’ak serbisu hanesan forsa.”
Mensajen:
“Husu ba alin sira-ne’ebé iha mehi atu sai forsa F-FDTL, hahú prepara an liuhosi estuda no kuidadu an
tanba odamatan instituisaun F-FDTL loke ba sidadaun hotu ne’ebé iha komitmentu hodi serbí. Keta haluha,
estuda tanba ho edukasaun maka bele transforma ita ba moris di’ak no lori ita ba atinji ita-nia mehi.”
Foti Husi: Lafaek Prima Edisaun 3/2021
