- Belun estuda iha universidade ida ne’ebé, no iha ne’ebe?
Iha tinan 2013, hau simu bolsu estudu husi USAID Timor-Leste Hillary Clinton Scholarship hodi
kompleta ha’u nian estudu iha area asosiadu ho siénsia no foka ba administrasaun no emprezesas ,
Opsaun ba Manajementu iha Hill Community College, Boston, Massachusetts. Iha tinan 2017, ha’u
simu bolsu estudu ba daruak husi programa USTL Scholarship ne’ebé hetan tulun husi departamentu
do Estadu husi Estadu Unidu Amerika no Konselleiru Amerikanu sira. Ha’u kontinua ha’u-nian estudu
hodi transferee fali ba University of South Dakota, no ha’u konsege hakotu ha’u-nian estudu ho
lisensiatura iha administrasaun no emprezesas ho destinsaun magna cum laude.
- Bolsu estudu hira mak belun aplika ba no konsege susesu iha hira?
Ha’u aplika ba bolsu estudu barak mak Australian Development Scholarship (iha 2012 no 2013),
Japanese Government Scholarship (iha 2013), no New Zealand Scholarship (2016) no mós bolsu
estudu USTL nian maibé ikus liu ha’u susesu iha bolsu estudu USAID Timor-Leste ba iha Hillary Clinton
Scholarship ne’ebé maka sai hanesan ha’u nia aplikasaun dahuluk no USTL maka sai hanesan hau nia
aplikasaun daruak.
- Diferensa saida entre bolsu estudu USAID no USTL?
Diferensa entre bolsu estudu rua ne’e maka hanesan; ba USAID nian oferese bolsu estudu ba ema
ne’ebé maka estuda ba tinan rua nia laran atu bele hetan grau asosiadu, maibé iha programa USTL
nian ne’ebé maka oferese bolsu estudu ba tinan haat nia laran atu hetan grau lisensiadu.
- Maneira saida mak Belun foti atu kompleta Belun nia aplikasaun?
Kada bolsu estudu iha ninia iha nia rekerimentu rasik. Ne’e duni, atu responde pergunta ida ne’e, hau
esplika bazeia ba ha’u nia esperiensia hanesan ezemplu ida ne’ebé ha’u aplika ba bolus estudu USTL
nian. Primeiru, ha’u lee didi’ak formatu aplikasaun ne’e, depois ha’u buka rekerimentu dokumentu
saida deit mak atu submete ba aplikasaun ne’e. Rekerementu ba bolsu estudu USTL nian maka
hanesan, aplikasaun kompletu ho ita nia asinatura, Estetmentu Pesoal, Karta Rekomendasaun rua (2),
valor transkreve ne’ebé Ofisiál no ita-nian fotokópia pasaporte. Ha’u mós husu ema sira ne’ebé uluk
ami serbisu hamutuk liu tinan ida hodi bele fó karta rekomendasaun mai ha’u atu bele suporta ha’u
nia aplikasaun. Ha’u mós tenke hakerek ho di’ak kona-ba estetmentu pesoal no mós responde ba
pergunta sira ho di’ak hodi nune’e bele fó valor di’ak ba ha’u atu sai hanesan kandidatu importante
ba bolsu estudu ida ne’ee. Ha’u mós lahaluha hare didi’ak ha’u nia grammar no sura liafuan ne’ebé
ha’u hakerek hotu ona. Ikus liu, asina formatu no anexu dokumentu hotu ne’ebé presiza molok atu
submete nia aplikasaun hirak ne’e.
- Hanoin saida mak belun bele fahe ba maluk sira seluk ne’ebé hakarak atu hetan bolsu estudu
Internasionál?
Se iha Bolsu estudu saida de’it, labele ta’uk atu koko! Labele sente dezanima bainhira koko mak la liu.
Buka atu hatene ita nia frakeza hodi hadi’a di’ak liu no koko nafatin. Keta haluha atu halo servisu
voluntáriu ka atividade serbisu ba komunidade, atividade sira bele tulun ita atu sai lider ne’ebé di’ak
no mós hasa’e koñesimentu kona-ba servisu iha área oioin no bele tulun mós maluk sira nia aplikasaun
ba bolsu estudu. Atu aumenta mós se belun sira iha planu atu tuir aplikasaun ba bolsu estudu e
hakarak eskola iha nasaun liur ne’ebé ko’alia ho lian Inglés, labele ta’uk atu uza “Google Translate” se
maluk sira la konfortavel ho maluk sira nia Inglés. Google Translate mós bele ajuda ita iha lian inglés .
Labele ta’uk atu husu professor/a lian Inglés nian ka belun sira ne’ebé hatene inglés atu ajuda lee no
kuriji maluk sira nia estetmentu pesoal.
- Saida mak Belun nia favoritu kona-ba hetan bolsu estudu ida ne’e?
Ha’u nia favoritu kona-ba hetan bolsu estudu ida nee mak hetan oportunidade halo estudu iha U.S.
(Amerika). Ha’u fiar katak ho teknolojia Amerika nian ne’ebé avansadu, Sistema edukasaun ne’ebé
kapás tebes, diversidade iha kultura, no wainhira ha’u fila mai Timor Leste ho kapasidade no hanoin
ne’ebé luan. Atu aumenta tan katak, estuda iha Amerika nee bele ajuda ha’u aumenta ha’u-nia
kapasidade no abilidade hodi bele sai ema emprezariu ne’ebé susesu
- Saida deit mak Belun halo ona depois de belun nia graduasaun?
Iha 2015, depois de gradua ho asosia iha área Business no Administrasaun, Ha’u servisu hanesan
Ejekutivu Rekursu Umanu ba Insurance Nasional Timor Leste (NITL). Maibé, depois de hetan hau nia
Baiserlatu iha 2019, ha’u deside deskansa fulan balun nia laran molok buka fali servisu seluk. Ha’u
hahú fali buka servisu iha fulan Outubru 2019 too agora, maibé tanba Pandemia Covid-19, atu hetan
servisu susar uitoan. Hein katak ha’u bele hetan fali servisu bainhira situasaun normal fali ona.
- Saida deit Belun nia planu ba futuru?
Ha’u hakarak dezenvolve ha’u nia karreira iha Rekursu Umanu, no ha’u fiar katak loron ida ha’u sei sai
Jestor ba Rekursu Umanu ne’ebé di’ak liu. Ha’u gosta loos servisu iha área departamentu Rekursu
Umanu tanba ha’u kontente liu servisu hamutuk ho ema, fahe matenek, aprende buat foun no ajuda
ema seluk.
