Varaidame Juice Bar hahú
iha tinan 2017 ho esperiénsia
ne’ebé mana Leonia hetan iha
rai-li’ur hakarak atu promove
fila-fali ita-nia ai-han lokál
sira hodi sai ai-han ne’ebé
saudavel. Bainhira nia fila mai
husi nasaun Inglaterra iha tinan
2012, mana Leonia hala’o
peskiza kona-ba ita-nia ai-han
lokál sira, maski ita-nia ai-han
lokál barak maibé komunidade
la hatene oinsá atu uza.
Tanba tuir mana nia hanoin katak ita
iha ona fasilidade saúde,
maibé iha parte ai-han nian laiha ema ida maka
kontrola, entaun liga ba agrikultura no saúde nian mana
Leonia, hari’i negósiu kona-ba prodús ai-fuan vitamina
no minerál hodi halo loja sumu nian ba ita-nia saúde.
Nia hahú ho fundus ne’ebé ki’ik, maibé mana iha
komitmentu nafatin hodi serbisu maka’as atu nune’e
ninia negósiu la’o nafatin.
Fundus balu Mana hetan husi kompetisaun iha IADE
kona-bá negósiu inovativu no sai manan-na’in ba 20
lugar hodi hetan osan $ 5,000.00, Osan hirak ne’e, nia
sosa materiál negósiu nian, hanesan sosa produtu husi
to’os-na’in sira, ekipamentu, selu uma aluga no selu
funsionáriu na’in-tolu.
Mana Leonia mós halo tratamentu terapia ba ema
ne’ebé kona moras ain-siin no ain bubu. Ho terapia ne’e,
ema barak maka konsege di’ak. Folin Terapia kada ema
ida $ 25.00.
Mana Leonia sei habelar tan informasaun liuhusi
treinamentu ba komunidade no ONG lokál balun
iha munisípiu nune’e komunidade sira koñese didi’ak
benefísiu ai-fuan no ai-han lokál ba ita-nia saúde. Agora
dadauk ho fundus $ 10.000 ne’ebé sira hetan durante
tinan-tolu. Mana sei loke tan loja sumu ne’e iha Munisípiu balun.
