Flaviana Filomena, nu’udar Manorin Pre-eskolár, Wedare, Suai vila.
Nia hakarak fahe hanoin kona-ba Revista Lafaek ba manorin no ninia atividade ne’ebé
baibain sira uza iha prosesu aprendizajen.
Atividade sira-ne’e balun mós liga ho planu sesaun iha kurríkulu nasionál.
Tuir ha’u-nia haree, Revista Lafaek ba manorin ne’e kapás tebes. Atividade iha
Revista Lafaek nia laran ne’ebé maka relevante ho pre-eskolár nian mak hanesan: Literasia Tetun, matemátika, (sura, forma jeométria), dezeñu, kriatividade (kolajen), tau kór hodi hamamar liman no istória badak. Iha pre-eskolár ne’e ami mós halo observasaun (ezame) uza mós Revista Lafaek hanesan materiál hodi sukat kanorin sira-nia koñesementu. Iha ezame, ami mós aloka loron ida hodi uza Revista Lafaek. Revista Lafaek ne’e nu’udar matadalan ida ba ami manorin
no tulun ami iha tempu naruk tebes hahú husi tinan 2001 to’o agora. Kanorin sira mós kontente tebes bainhira simu Revista Lafaek. Ami mós uza atu halo TPC ba kanorin sira.
Bainhira hahú aula, manorin husu kona-ba saida de’it maka sira haree no aprende iha Revista laran. Bainhira simu Revista Lafaek ne’e tenke kuidadu, tanba kapás tebes no tulun duni manorin sira, iha prosesu aprendizajen. Iha mós konteúdu
ne’ebé maka liga hela ho planu sesaun.
Husu ba CARE, atu fahe nafatin Revista Lafaek ne’e mai ami-nia eskola, tanba Revista
Lafaek ne’e tulun tebes manorin no kanorin sira iha prosesu aprendizajen.
Foti Husi: Lafaek ba Manorin, Edisaun 2/2019
