FETO PESKADORA.
Ataúru hanesan Illa ki’ik ida iha Timor-Leste ho distánsia hosi Sidade Dili oras 2 bainhira ita liuhosi tasi.
Ataúru koñesidu ho Produtu lokál ikan, iha ne’ebá ita hasoru Sra. Rosita Belo da Costa husi suku Bikeli, Aldeia Pala, Postu Administrativu Ataúru, Munisípiu Dili. Sra. Rosita kria serbisu ba nia an ho nia bero rasik. Bainhira nia sei ki’ik, nia sempre tuir nia inan-aman bá tasi hodi peska, nia mós hahú aprende oinsá atu kail no luku.
Esperiénsia sira-ne’e halo Sra. Rosita iha inisiativa atu hola parte sai hanesan peskadora, hodi halakon presepsaun sosiál ne’ebé hateten katak; Knaar hanesan peskadór ne’e mane de’it maka bele halo.
Sra. Rosita dehan; Sai peskadóra la’ós fasil, tanba sempre hasoru udan, anin, laloran ne’ebé boot. Dalaruma ha’u hetan ikan ladún barak, fa’an mós hetan osan uitoan de’it. Ne’e sai hanesan esperiensia ne’ebé akontese ba ha’u rasik. Ezemplu, ha’u ba kail, ankor ka’it iha fatuk, ha’u luku tuun ba tasi hodi hasai ankor ne’ebé maka ka’it iha fatuk, hafoin ne’e ha’u nani sa’e ba leten no besik ba ró no hi’it ain tula ba ró.
Maske hasoru dezafiu oioin, maibé ha’u sempre hetan suporta husi ha’u-nia kaben hanesan; tulun halo serbisu uma-laran no tau matan ba ami-nia oan. Husi esperiensia hotu ne’ebé mak iha ha’u sente orgullu tebes tanba ami-nia oan sira bele eskola, balun hetan serbisu hodi hadia ekonomia uma- laran nian.
Sra. Rosita nian masajen; belun sira karik iha mehi tenke hahú, karik la hahú mehi ne’e la realiza. Ba belun mane sira, koko fó suporta nafatin feto sira iha serbisu uma-laran no públiku. Ba inan-aman sira, haruka nafatin oan feto sira bá eskola ho nune’e, bele hamenus kultura ne’ebé dehan feto labele halo serbisu públiku.
Autor: Ekipa Lafaek
