Poupa Agora Di’ak ba Futuru

 

 

Lafaek nia kolega sira, tanbasá rai osan importante?

Ita hotu konkorda katak rai-osan di’ak ba aban-bainrua. Osan ne’e bele ajuda ita bainhira ita katuas no ferik ona seluk mak bainhira ita hari’i familia ona osan ne’ebé ita rai ona ne’e sei ajuda tebes ita atu selu labarik sira-nia eskola no nesesidade seluk.

Labarik sira presiza osan barak bainhira sira tama ona iha universidade, entaun presiza rai osan hahú ohin.

 

Atu bele asegura ita bele rai osan ne’ebé ita hetan ona ho didi’ak tuir mai sujestaun ne’ebé ita bele koko halo tuir?

 

1. Rai osan tuir ita-nia rendimentu

Ita bele rai osan 15 to’o 25 porsentu ita nia osan kada fulan, maibe labele depende ba kalkulasaun ida ne’e, iha situasaun balun ne’ebé halo ita mós la bele rai tuir persenjaten ki’ik liu no bele mós boot liu.

 

2. Rai iha fatin seguru hanesan kofre ka banku
Bainhira ita rai iha banku ita nia osan sei seguru liutan. Alende ne’e ita bele hili konta bankaria fó kondisaun balun hanesan la ko’a ita nia osan kada fulan no labele foti tuir durasaun ne’ebé ita desidi.

 

3.Halo prioridade ba gastu

Hodi bele hatene prioridade saida deit iha kada fulan maka ita presija tau atensaun, ita bele halo lista ida-ida, maibe tenki hanoin, tau iha lista SAIDA MAKA PRIORIDADE LIU.

 

Di’ak liu tan kuandu ita mós bele fo tarjetu ba ita nia aan montante hira maka atu gasta, por ezemplu $20 iha semana ida. Ida ne’e hanesan esforsu hodi kontrola ita nia hakarak.

 

4.Gastu labele boot liu rendimentu

Sei ita sente katak durante ne’e ita nia osan ne’ebé sai barak liu fali ita nia rendimentu, ita bele koko hodi kontrola liu husi hakerek tutuir rendimentu no gastus ne’ebé ita hasai tiha ona.

 

Nune’e bele hatene osan ne’e sai ba ne’ebé no ikus mai bele ajuda ita hodi hamenus gastus ne’ebe la importante.

 

Karik ita bele hatoman an halo ida ne’e kada fulan, ita-nia familia nia-futuru sei di’ak liu tan.

 

“Eduka membru família agora, atu hatoman an poupa osan.”