Iha tempu uluk, iha avó-feto ida hela iha nia to’os no
hakiak mós asu-inan ida ho naran Bui-Laco. Iha tempu
bai-loron naruk iha fatin ne’ebá bee maran hotu.
Entaun, avó tenke bá buka bee iha fatin seluk ne’ebé dook.
Iha loron ida, avó ne’e haree nia asu isin-bokon. Entaun
avó ne’e husu ba nia án. “Agora bai-loron naruk, bee
maran hotu, asu ne’e hetan bee husi ne’ebé maka nia
bele bokon hanesan ne’e”?
Avó-feto hakfodak liután haree nia asu
loron-loron mai, sempre bokon nafatin.
Nune’e, avó-feto hanoin atu oinsá bele
hetan mós bee ne’e. Tanba avó-feto
matenek, nia foti ahi-kadesan hodi falun
ho batar-kulit no tuu ku’ak ki’ikoan hafoin
tara iha asu nia kakorok. Atu nune’e asu
ne’e bainhira bá karik, ahi-kadesan ne’e
bele sulin tuir dalan to’o iha fatin ne’ebé bee iha. Ho maneira ida ne’e, avó-feto la’o hodi bukatuir
ahi-kadesan ne’ebé sulin tuir dalan, to’o hetan mós
bee-matan ne’e. Bee-matan ne’e naran, bee-matan
Bui-Lua.
Ohin loron bee ne’e fornese ba populasaun ne’ebé
hela iha Loi-Huno, nomós ba populasaun Viqueque
tomak.
