Iha tempu uluk, iha liurai ida naran Sutaur ne’ebe ukun iha suku Leometa. Suku ida-ne’e
baliza ho suku Leomuti maibé tanba liurai si’ak ten, uza nia podér hodi hadau tan suku
Leomuti sai suku ida de’it ho Leometa. Povu husi suku Leomuti, hakarak halo funu hasoru nia
maibé ta’uk tanba Liurai Sutaur iha forsa barak. Liurai sutaur halo povu sira sai atan ba nia.
Lori tempu ba tempu Liurai Sutaur komesa katuas no labele la’o ona. Sutaur susar atu kontrola
área sira husi suku rua ne’e maibé nia la fó poder ba ema seluk, nia hakarak ukun to’o mate.
Molok atu mate, Sutaur loke kompetisaun kuda halai taru. Nia
hateten katak, kompetiasaun ne’e sei halo ba ema joven de’it husi
suku Leomuti no Leometa. Karik husi Leomuti maka manán nia sei
husik Leomuti sai suku ida hamriik mesak.
Povu Leomuti sente ida-ne’e oportunidade osan-mean atu sira bele
hamriik mesak ona maibé sira laiha joven ida ne’ebé bele halai kuda
ho di’ak. Sorte di’ak tanba rai na’in no matebian sira nia tulun, joven ida naran Mauhunu, nia oferese
nia an hodi tuir torneiu ne’e. Ema hotu dúvidas ba nia, tanba liurai Sutaur nia ema sira mesak
treinu beibeik no sira hanoin katak Mauhunu sei lakon iha tempu ne’ebá.
Maibé Mauhunu konsege duni, molok ba tuir kompetisaun ne’e, Mauhunu haruka lia na’in sira
kuta malus hodi fó kbiit ba nia hodi bele manán.
Sorte di’ak, iha kompetisaun ne’e ema hotu hakilar ho tanis tanba Mauhunu konsege halakon
Sutaur nia ema sira.
Ema hotu hi’it Mauhunu aas tebes tanba nia bele salva reinu sira husi Sutaur nia ukun.
Iha momentu ne’ebá, povu sira husi suku Leomuti hili Mauhunu sai sira-nia liurai hodi ukun suku
Leomuti. Husi Mauhunu nia ukun, halo Povu hotu-hotu moris hakmatek iha pás nia laran.
Ai-knanoik ne’e husi
Sr. Ximenes da Silva Soares
Husi Suku Asu-manu, Munisípiu Liquiça.
Modifika husi ekipa Lafaek.
Lafaek Ba Komunidade, 2/2018
